اخبارية شبكة بني تميم /

ابيات مهدات من الشاعر صالح بن دوخي الشطيطي الى الشيخ عثمان بن مرشد المفيد التميمي راعي بلدة جفيفاء المعروفة غرب منطقة حائل 100كلم , حيث ان ابو فهد رجل كريم ووفي ويستاهل الطيب وما يقال فيه من مدح , وفقه الله لكل خير .

رد الشاعر / سامي بن صالح العرفج التميمي على الشطيطي في هذه الابيات 

 وصل سلامي للشطيطي من مطير

وقل له وردت مزهبين الطراقي

اهل جفيفا محتمين المظاهير
ما خاب من جاهم علي الطلاقي

منصى البعيد ومدهل للخطاطير
اخوان من باله من الوقت ضاقي

عيال مرشد بالليال المعاسير
وش انت فيهم يا ابيض الوجه هاقي

يبرون لك مثل المزون المغاتير
لا خاب ظنك في قصير الرواقي

ياللي بهم تسمع وتدري وش يصير
لا جيتهم في دارهم ما انت لاقي

إلا السعد والعز والجود والخير
وحجاج ينسيك العنا والضياقي

ماضيهم أكبر من علوم وتخابير
مفاخرٍ وصلت لشط العراقي

وحاضرهم تكمل عليه المناعير
عثمان وعياله سعد كل هاقي

وجيههم مثل الحيا والتباشير
وصدورهم مثل الثمان الطباقي

ووقفاتهم تطنخ وفزعاتهم غير
وهداتهم يفرح بها كل شاقي

ومطلاعهم اليا كثرن العواثير
ماهيب تآمنها فروخ السماقي

تلقى بجيرتهم حشيمة وتقدير
وتنسى بخوتهم عيال النفاقي

وإن كانها بالجود قل للهوامير
حيرانهم ما هيب تحت النياقي

تنحر على مد الهلا للمسايير
وتبرك على كبار الصحون العتاقي

يالله عسى اللي يجمعون الدنانير
يفدون روس مزهبين الطراقي

واللي يقول الوقت ما عاد به خير
قولوا ترى عثمان حيٍ وباقي

ابو فهد عثمان زبن المخاسير
ما خاب من جا له على الطلاقي